၁။ ကြာပန်းလေးလို ကျင့်နေမှာ
ရွှံ့နွံကြားမှာပေါက်ဖွားပေမယ့် ရွှံ့နွံမလိမ်းကျံ မကပ်ငြိတဲ့ကြာကို သူတော်ကောင်းတိုင်း အတုယူသင့်ပါတယ်။
လောကဓံရွှံ့နွံတွေ ကာမဂုဏ်ရွှံ့နွံတွေကိလေသာရွှံ့နွံတွေကြားမှာ ပေါက်ဖွားကြီးပြင်းလာပေမယ့်
အဲဒီရွှံ့နွံတွေနဲ့မလိမ်းကျံ မကပ်ငြိတဲ့ ပုဂ္ဂိုလ်ဟာ သန့်စင်မြင့်မြတ်တဲ့ ကြာလိုလူအစစ်ပါပဲ။
၂။ ရလေလိုလေ
ဒီအရသာလေးကို တစ်ခါလောက် ခံစားခွင့်ရရင်
ကျေနပ်ပါပြီလို့ တောင်းတခဲ့ပေမယ့်
တကယ်လည်းခံစားရရော အကြိမ်ကြိမ်အခါခါ
ခံစားချင်စိတ်ဖြစ်လာပါတယ်။
ဆားငန်ရေသောက်ရတဲ့သူဟာ ဘယ်တော့မှ ရေငတ်မပြေဘဲ
သောက်ပြီးရင်း သောက်ချင်ရင်း ဖြစ်နေသလိုပါပဲ။
၃။ အချစ်ဆိုတာ မာရ်နတ်ပါ
အချစ်ဆိုတာ နှလုံးသားနဲ့ ဘဝကို
သတ်ဖြတ်ဖျတ်ဆီးပစ်တတ်တဲ့ မာရ်နတ်တစ်ပါးပါပဲ။
ဖြူစင်သန့်ရှင်း အေးချမ်းကြည်လင်တဲ့ စိတ်ဓာတ်တွေ၊
အကန့်အသတ်မဲ့ ဘဝတိုးတက်မှုတွေကို နှောင့်နှေးရပ်တန့်
ချုပ်ဆုံးသွားစေတဲ့အရသာဟာ အချစ်ပါပဲ။
၎။ အားထုတ်ဖြစ်ဖို့က အဓိက
ရောဂါပျောက်ချင်လို့ တရား အားထုတ်တာလည်းကောင်းပါတယ်။
စီးပွားရေး လူမှုရေး အဆင်ပြေ တိုးတက်ချင်လို့တရား အားထုတ်တာလည်း ကောင်းပါတယ်။
စိတ်ဓာတ်ခိုင်မာငြိမ်းချမ်းပြီး စိတ်နေသဘောထားကြီးကျယ်
မြင့်မြတ်ချင်လို့တရား အားထုတ်တာလည်းကောင်းပါတယ်။
ခန္ဓာဇာတ်သိမ်း ဒုက္ခငြိမ်းချင်လို့တရား အားထုတ်တာကတော့အကောင်းဆုံးပါပဲ။
၅။ ညာစဉ်နဲ့ပဲ ညားလိမ့်မယ်
တရားကို တရားနဲ့တူအောင် အားမထုတ်ဘဲ
ဟန်ဆောင်ပန်ဆောင် လူအထင်ကြီးအောင်လုပ်နေမယ်
ကမ္မဋ္ဌာန်းဆရာကိုလည်း အမှန်အတိုင်း တရားမလျှောက်ဘဲ
မဟုတ်မဟတ်လုပ်ဇာတ်ခင်းပြီး လျှောက်မယ်ဆိုရင်
အဲဒီယောဂီဟာ ဥာဏ်စဉ်နဲ့ဝေးပြီး
ညာစဉ်နဲ့ပဲ ညားရပါလိမ့်မယ်။
၆။ ဓာတ်ကူးကောင်းမှ ဓာတ်ကောင်းကူးမယ်
မြတ်စွာဘုရားရှင်ရဲ့ ဂုဏ်ပုဒ်အမည်တိုင်းရဲ့ နောက်ကွယ်မှာ
ကြည်ညိုလေးမြတ်ဖွယ် လိုက်နာတုကျင့်ဖွယ် အဓိပ္ပါယ်အနှစ်တွေက
နက်ရှိုင်းစွာ ကိန်းဝပ်နေတာမို့
ကိုယ့်စိတ်ဓာတ်နဲ့ ကိုယ့်လုပ်ရပ်ကို အသန့်စင်ဆုံး အမြင့်မြတ်ဆုံး
တည်ဆောက်လိုသူတိုင်း မြတ်စွာဘုရားရှင်ရဲ့ ဂုဏ်ပုဒ်တွေကို
နှလုံးသားထဲမှာ အမြဲတမ်း ဖော်ထုတ်ဆင်ခြင်နေသင့်ပါတယ်။
၇။ ချစ်လေပူလေ
သောကမှန်သမျှချစ်ခြင်းကြောင့်ဖြစ်ရတာပါ။
ချစ်စရာတစ်ခုရှိရင် သောကတစ်ခုရှိမယ်။
ချစ်စရာဆယ်ခုရှိရင် သောက ဆယ်ခုရှိမယ်။
ချစ်စရာအများကြီး ရှိရင်တော့ သောက အများကြီးရှိမယ်ပေါ့။
သောကငြိမ်းချင်ရင် ချစ်စရာတွေကို လျှော့ပစ်နိုင်ရမယ်လေ။
ချစ်ရမယ့်သူ ချစ်ရမယ့်အရာနည်းပါးသွားလေ
သောကမီးလည်းချုပ်ငြိမ်းသွားလေပါပဲ။
၈။ ဘဝမမေ့နဲ့
လူအသက်တစ်ချောင်းဟာ ဝင်လေနဲ့ထွက်လေကြား သို့မဟုတ်
ထွက်လေနဲ့ဝင်လေအကြားမှာပဲရှိတာမို့
ဝင်လေထွက်လေသည်ပင်လျှင် လူတစ်ယောက်ရဲ့ဘဝပါပဲ။
ဝင်လေထွက်လေကို မေ့နေတဲ့သူဟာ ဘဝမေ့နေတဲ့သူဖြစ်ပြီး
ဝင်လေထွက်လေကို မမေ့တဲ့သူဟာ ဘဝမမေ့တဲ့သူပါ။
ဘဝမမေ့တဲ့သူဖြစ်ချင်ရင် ဝင်လေထွက်လေမှာ အမြဲမပြတ် သို့မဟုတ်
မကြာခဏသတိကပ်ထားပြီး သိနေပါ။
၉။ စိတ်ညံ့ရင် သိပ်လန့်တယ်
စိတ်ဆင်းရဲခြင်းဆိုတာက စိတ်ဓာတ်ပျော့ညံ့တဲ့သူတွေ
ကန်ထရိုက်ဆွဲထားတဲ့ ခပ်ညံ့ညံ့ပစ္စည်းတစ်ခုပါ။
စိတ်ချမ်းသာခြင်းကတော့ စိတ်ဓာတ်ခိုင်မာသူတွေရဲ့
မူပိုင်ရတနာထုပ်ကြီး တစ်ခုဖြစ်ပါတယ်။
၁၀။ အချစ်ကံဆိုးတာ အဆိုးကံချစ်လို့
အချစ်ရေး အိမ်ထောင်ရေးမှာ အကျိုးပေးမကောင်းတာဟာ
အချစ်ရေး အိမ်ထောင်ရေးနဲ့ ပတ်သတ်တဲ့မကောင်းကံတွေ
အတိတ်ကပြုလုပ်ခဲ့ဖူးလို့ပါ။
သူတစ်ပါးရဲ့ချစ်ခြင်းကိုခွဲခဲ့တဲ့သူ သူတစ်ပါးအိမ်ထောင်ကို
ပြိုကွဲစေခဲ့တဲ့သူဟာ အချစ်ရေး အိမ်ထောင်ရေးမှာ
ဘယ်လိုနည်းနဲ့မှ အကျိုးပေးမကောင်းနိုင်ပါဘူး။
ဦးဇင်းရဲ့ ၀ိရဓမ္မ ဘလော့မှာလည်း သွားရောက်လေ့လာဖတ်ရှုနိုင်ပါတယ် ခင်ဗျာ။ အရှင်ဆန္ဒာဓိက၏ (စိတ်အားဖြည့်ဓမ္မသံ စဉ်) များကို ning ဆိုက်များတွင် ဦးဇင်း
အရှင်ဝိမလဝံသ ပို့စ်တင်ကတည်းက ကြိုက်နှစ်သက်မိလို့ ကျွန်တော်ကူးထားတာ
ကြာပါပြီ။ ကျွန်တော့်ရဲ့ဘလော့လေးမှာ လည်းသိမ်းထားချင်တာကြောင့် အခုလို
ပြန်လည်ဖော်ပြလိုက်တာပါ။
သူငယ်ချင်း ညီအကို၊ မောင်နှမများ အားလုံး ဘ၀အမောတွေပြေကြပါစေ ခင်ဗျာ။
ရာဇာထွေး
No comments:
Post a Comment