Wednesday, March 14, 2012

ပြောသလိုလုပ်မှ သူတော်ကောင်း(စိတ်အားဖြည့်ဓမ္မသံစဉ်)















၁။ အနေဆိုးတာ အဆိုးနေဖို့မဟုတ်

ကျန်းမာရေးကောင်းကောင်း မကောင်းကောင်း

အနာရောဂါ ရှိရှိ မရှိရှိ တရားအားထုတ်မှုကိုတော့

လုံးဝလက်မလွှတ်သင့်ပါဘူး။

အနာရောဂါဖြစ်လာတာဟာ သတိအားကောင်းဖို့ မမေ့လျော့ဖို့

ဖြစ်လာတာပဲလို့ နှလုံးသွင်းပြီး မကျန်းမာတဲ့ကြားထဲကပဲ

စွမ်းနိုင်သလောက် ကြိုးစားအားထုတ်ရပါမယ်။


၂။ စိတ်ဖျားနေရင်ဆေးကုပါ

အရာရာကိုအကောင်းဘက်ကနေ ကြည့်တတ် မြင်တတ် နှလုံးသွင်းတတ်တဲ့

ယောနိသောမနသိကာရမရှိခြင်းကြောင့် စိတ်ကျမ်းမာရေး ချွတ်ယွင်းရတာပါ။

အကောင်းထဲမှာလည်း အဆိုးရှိ အဆိုးထဲမှာလည်း အကောင်းရှိတာမို့

အကောင်းနဲ့ အဆိုးကိုမျှတအောင် တွေးယူပြီး စိတ်တည်ငြိမ်အောင်

ထားတတ်မယ်ဆိုရင် အကောင်းနဲ့ တွေ့လို့လည်းစိတ်မတက်တော့ပါဘူး။

အဆိုးနဲ့တွေ့လို့လည်းစိတ်မပျက်တော့ပါဘူး။

ဒါဆိုရင်စိတ်ကျန်းမာရေးကောင်းပါပြီ။


၃။ ပါရမီမပြည့်ဘဲ နိဗ္ဗာန်မရောက်နိုင်

ပါရမီကတော့ သံသရာလွတ်လိုသူတိုင်းအတွက် မရှိမဖြစ်လိုအပ်ပါတယ်။

ပါရမီဆိုတာ မြင့်မြတ်သူတွေရဲ့အလုပ်ကိုခေါ်တာပါ။

ဒါန၊သီလ၊သမထ၊ဝိပဿနာအလုပ်တွေဆိုတာ

မြင့်မြတ်သူတွေရဲ့အလုပ်ဖြစ်လို့ အဲဒီအလုပ်တွေပြုလုပ်အားထုတ်နေတာဟာ

ပါရမီဖြည့်နေတာပဲပေါ့။


၎။ ကြေးစားယောဂီ

အကြံအစည်အောင်မြင်ချင်လို့

လိုအင်ဆန္ဒုပြည့်ဝချင်လို့ဆိုတဲ့ လောကီအကျိုးစီးပွားမျှော်လင့်ချက်နဲ့

တရားအားထုတ်နေတဲ့ယောဂီကို ကြေးစားယောဂီလို့ခေါ်ပါတယ်။

ပထမပိုင်းမှာ မွန်မြတ်သန့်စင်တဲ့ ရည်ရွယ်ချက်မရှိပေမယ့်

တရားအားထုတ်ရင်း အသိဥာဏ်ရင့်ကျက်လာရင်တော့

ရည်ရွယ်ချက်လည်းမွန်မြတ်သန့်စင်လာမယ်

တရားအဆင့်လည်း အံ့သြဖွယ်ရာတိုးတက်လာပါမယ်။

ဘာအကြောင်းပြချက်နဲ့ပဲဖြစ်ဖြစ်

တရားကို အားထုတ်ဖြစ်အောင် အားထုတ်လိုက်ပါ။


၅။ အကောင်းမိုးမှ အမိုးကောင်းမယ်

အမိုးကျဲနေတဲ့အိမ် မိုးရေနှိပ်စက်မယ်။

အမှတ်ကျဲနေတဲ့စိတ် ကိလေသာနှိပ်စက်မယ်။

ကိုယ်ရဲ့စိတ်အိမ်ကို သတိအမိုးစိပ်စိပ်မိုးမှ

ကိလေသာမိုးရေဘေး ကင်းဝေးလိမ့်မယ်။


၆။ စိတ်ကြည်ဆေးလေးသောက်လိုက်ပါဦး

တစ်ခါတစ်ရံ ဝိပဿနာတရားရှုမှတ်ရင်းနဲ့

စိတ်တွေနောက်ကျူနေတဲ့အခါ

စိတ်တွေမကြည်မလင်ဖြစ်နေတဲ့ အခါမျိုးတွေမှာ မိမိအားသန်တဲ့

မြတ်စွာဘုရားရှင်ရဲ့ ဂုဏ်တော်တစ်ခုခုကို ပွားများပြီးတော့နေမယ်ဆိုရင်

ဒါမှမဟုတ် မေတ္တာဘာဝနာ ပွားများပြီးတော့နေမယ်ဆိုရင်

စိတ်ကလေးကြည်လင်သွားပါတယ်။

စိတ်ကလေးကြည်လင်သွားတဲ့အချိန်မှာ

ဝိပဿနာကိုဆက်ပြီး ရှုမှတ်သွားမယ်ဆိုရင်

ပိုပြီးအကျိုးကျေးဇူးကြီးမားပါတယ်။


၇။ ဝမ်းနည်းနေတာအလုပ်မရှိလို့

ကိုယ်တန်ဖိုးထားတဲ့ အလုပ်တစ်ခုခုကို

စိတ်ဝင်စားမှုအပြည့်အဝနဲ့ စွဲစွဲမြဲမြဲ လုပ်နေခဲ့ရင်

စိတ်ဓာတ်တွေခိုင်မာပြီး အသိဥာဏ်တွေရင့်ကျက်လာမှာပါ။

နှလုံးသားတွေမာကျောနေမှတော့ ဘာသဘောနဲ့ဘယ်သူကိုယ့်ကိုစွန့်စွန့်။

တွန့်လွန့်မနေတော့ပါဘူး။ နှုတ်ဆက်ပြုံးပြရုံပေါ့ကွယ်။


၈။ ခန္တီတာဝန်

ဆဲဆိုတာ သူ့အလုပ် ၊ သည်းခံတာကိုယ့်တာဝန်။

ကဲ့ရဲ့တာသူ့အလုပ်၊ သည်းခံတာကိုယ့်တာဝန်။

ချစ်စရာကောင်းတာ သူ့အလုပ်။

မချစ်မိအောင် သည်းခံတာကိုယ့်တာဝန်။

မုန်းစရာကောင်းတာ သူ့အလုပ်

မမုန်းမိအောင်သည်းခံတာ ကိုယ့်တာဝန်။

အာရုံတွေပေါ်တာ သူ့အလုပ်

ကိလေသာမဖြစ်အောင်သည်းခံတာ ကိုယ့်တာဝန်။


၉။ တကယ်ချစ်ရင် ခွင့်လွှတ်တယ်

ရှေးရေစက်ကြီးလွန်းလို့ တွေ့ခွင့်၊ဆုံခွင့် ချစ်ခင်ခွင့်

ရခဲ့ကြတာမဟုတ်လား။

ဘာလို့များ တစ်ယောက်အပေါ်တစ်ယောက်။

ခွင့်မလွှတ်နိုင်လောက်အောင် စိတ်ဆိုးငြိုးတေးနေရတာလဲ။

နာကျည်းမှု ကုဋေကုဋာနဲ့ ဝမ်းနည်းစွာလမ်းခွဲခဲ့ကြမှတော့။

သံသရာတစ်ကွေ့ ပြန်လာတွေ့တဲ့အခါ။

ဘယ်လိုအပြုံး ဘယ်လိုမျက်လုံးတွေနဲ့

နှုတ်ဆက်ပွေ့ဖက်ကြမလဲကွယ်။


၁၀။ ပြောသလိုလုပ်မှ သူတော်ကောင်း

သတိအကြောင်း၊ ဝိပဿနာအကြောင်းတွေ

ဖောင်ဖောင်ကြီးပြောနေပေမယ့် စိတ်နေစိတ်ထားရော

ကိုယ်ကျင့်တရားနဲ့ ကိုယ်နှုတ်အမူအရာရော

ပြောင်းလဲတိုးတက်လာမှု မရှိဘူးဆိုရင် အဲဒီလူဟာ

ချုန်းပြီးမရွာတဲ့ မိုးနဲ့အတူတူပါပဲ။




မှတ်ချက်။     ။အရှင်ဆန္ဒာဓိက၏ စိတ်အားဖြည့် ဓမ္မသံစဉ် စာအုပ်မှ ကောက်နှုတ်ချက်ဖြစ်ပါသည်။

စာဖတ်သူအားလုံး ကိုယ်စိတ်နှစ်ပါး ကျန်းမာချမ်းသာကြပါစေ။

အရှင်ဝိမလဝံသ(နာလန္ဒာတက္ကသိုလ် အိန္ဒိယနိုင်ငံ)

www.wiradhamma.blogspot.com/

ဦးဇင်းဘလော့မှာလည်းလာရောက်ဖတ်ရှုနိုင်ပါသည်။

1 comment:

  1. မှတ်သားသွားပါတယ် ကိုရာဇာရေ..ကျေးဇူးနော် အခုလိုဖတ်ခွင့်ရတာ..

    ReplyDelete

Gadget

This content is not yet available over encrypted connections.
“ သင့်ရဲ့စကားလေးတစ်ခွန်းက နေ့သစ်တွေအတွက် အားဆေးလေးတစ်ခွက်ပါ”... သူငယ်ချင်း ညီအကိုမောင်နှမများအားလုံးဘ၀ အမောတွေပြေ ကြပါစေခင်ဗျာ...
“ Blog မိတ်ဆွေ၊ သူငယ်ချင်း၊ ညီအကို မောင်နှမများ..”

Color Code ယူရန်: